धनकुटा,२४ पुस
पाँचौ चौबिसे गाउँपालिका स्तिरिय पुरुष तथा महिला चौबिसे रनिङ्ग फुटबल प्रतियोगिता माघ १ गतेबाट शुरु हुने भएको छ ।
आयोजक चौबिसे गाउँपालिका धनकुटाले मंगलबार पत्रकार सम्मेलन गरेर खेल तालिका सार्वजनिक गर्दै वडा नं।२ मुढेवासअख खेलको आयोजना गर्न लागेको जानकारी दिएको छ ।
कार्यक्रमका प्रमुख अतिथी तथा पालिका अध्यक्ष राजकुमार लिम्बूले चौबिसे खेल पर्यटनको बिकास गर्नका लागि खेलको आयोजना गर्न लागिएको जानकारी दिनुभयो ।
चार दिन सम्म सञ्चालन हुने खेलकुद कार्यक्रममा मगर जातिहरुमा आधारित खानपान तथा कला संस्कृतिहरुको आनन्द लिन सकिने लिम्बूले जानकारी दिनुभयो ।
प्रतियोगितामा आठ वटा वडाका आठ पुरुष र आठ महिला गरी जम्ममा १६ टोलीको सहभागिता रहने चौबिसे गाउँपालिका खेलकुद बिकास समितिका संयोजक धनबहादुर लिम्बूले जानकारी दिनुभयो ।
बिजेता पुरुष टोलीले नगद ६५ हजार सहित मेडल,प्रमाण–पत्र र रनिङ्ग शिल्ड पाउने छ । उप बिजेताले नगद ३५ हजार र मेडल,प्रमाण–पत्र पाउने छ ।
त्यस्तै महिला तर्फ बिजेता टोलीले नगद ३५ हजार सहित मेडल,प्रमाण–पत्र र रनिङ्ग शिल्ड पाउने छ । उप बिजेता टोलीले नगद २५ हजार र मेडल,प्रमाण–पत्र पाउने पालिका खेलकुद बिकास समितिका सदस्य जीवन कटुवालले जानकारी दिनुभयो ।
तेश्रो पटक लगातार जितेर वडा नं।६ राजारानीले पालिकाको पहिलो रनिङ्ग शिल्ड गत बर्ष पूर्ण रुपमा जितेर लगेको थियो । महिला तर्फ भने यो पटकबाट मात्र रनिङ्ग शिल्डको शुरुवात गरिएको हो ।
त्रिबेणी यूथ क्लव मुढेबासको ब्यबस्थापनमा माघ चार गते सम्म वडाको त्रिवेणी खेल मैदानमा हुने सो खेलमा ए क्याटोगरीका एनफा रेफ्री तुफान चेम्जोङले खेल खालाउनुहुनेछ ।
नकआउटका आधारमा खेलाईने उक्त खेलमा २३ बर्षका तीन खेलाडी सहित २० बर्ष भन्दा मुनिका खेलाडीहरुको सहभागी रहने आयोजकले जानकारी दिएको छ ।
कार्यक्रममा पालिकाका उपाध्यक्ष टंकमायाँ पाङ्मी मगर,प्रमुख प्रशासकीय अधिकृत पर्शुराम दाहाल,लेखा प्रमुख सोभित कुमार तुम्बा,धनकुटा फुटबल संघका अध्यक्ष मणी जेम्जोङ्ग लगाएत वडा अध्यक्षहरुको उपस्थिति रहेको थियो ।
